كاتبة مصرية:هشام رفع رأس جميع المصريين علشان اللبنانيات يعرفوا أن الرجل المصري مش قرطاس

غزة-منتديات الحلا
كتبت غادة شريف في بابها بجريدة 'الفجر المصرية' أوعى تاخدها بجد :
'ما لهم يعني الأرتيستات المصريات؟ لا هيدفعوا فيهم خلو رجل باهظ الثمن ولا هيكلفوهم شيء وشويات، والواحدة منهم ما بتتططش لا هنا ولا هناك، يعني يوم ما الواحدة منهم تغلط ورجل الأعمال من دول يحب يقتلها علشان ما تعملش كده تاني، العملية هتم في مصر وعلى مية بيضة وهتكون آخر نظافة بس برضه ما اقدرش أنكر أن رجل الأعمال ده رفع رأس جميع المصريين علشان اللبنانيات وغيرهن يعرفوا أن الرجل المصري حفيد الفراعنة مش قرطاس، لكن الحقيقة أنا صعبان عليا القاتل اللي نفذ العملية، اتقر عليه ياعيني، وما لحقش يتهنى بالمبلغ وعلى طول اتقبض عليه، لكن لو كانت سوزان تميم دي بقى مصرية واتقتلت في مصر وكان الموضوع بقى في أيدي جهات التحقيق المصرية من أوله لآخره، وكان القاتل هياخد وقته وراحته في تستيف الفلوس في البنوك وبعدها كان هيسافر على لندن في رعاية الله وحفظه لغاية ما الموضوع يتنسي، أما السؤال بقى اللي نفسي أعرف اجابته، يا ترى رجل الأعمال ده دفع كام بقى في شنط رمضان أو في موائد الرحمن؟.
ده إذا كان وزع شنط من أساسه، بس بالتأكيد بيعمل موائد رحمن لزوم البرستيج، ويا ترى بقى بعد ما قتل ودفع، وجه شهر رمضان هل بقى نوى صيام الشهر عادي كده وكأن شيئا لم يكن؟!! فعلا لله في خلقه شؤون، وعموما الحمد لله ان كل الملابسات دي حصلت علشان المرأة المصرية تسترد الريادة ويتعظ رجال الأعمال في جميع أقطار الوطن العربي ويصدقوا أن مصر هي بلد الأمن والأمان، ليهم وللي هينفذ العملية".